काठमाडौँ, माघ २६ । प्रतिनिधिसभा सदस्य निर्वाचन अन्तर्गत दलहरूले प्राप्त गरेको सिट संख्या निर्वाचन आयोगले आज सार्वजनिक गर्दै छ ।
सिट संख्या सार्वजनिक गरेर आजै आयोगले राजनीतिक दलहरुलाई तीन दिनको समय दिएर समानुपातिकमा विजयी उम्मेद्वारको नाम माग्ने तयारी पनि गरेको हो । यसअघि एकसाताको समय दिइने भए निर्वाचन आयोगले कार्यविधि संशोधन गरेर तीन दिन बनाएको हो ।
निर्वाचन आयोगका अनुसार राजनीतिक दलहरुलाई नाम सिफारिस गर्न २९ गतेसम्मको समय दिइनेछ । त्यसपछि दुई दिन नाम सच्याउनुपर्ने अवस्था भएमा सच्याउन समय दिइने आयोगले बताएको छ ।
संघीय संसदमा ३३ प्रतिशत महिला हुनुपर्ने संवैधानिक व्यवस्था भएको भन्दै निर्वाचन आयोगले राष्ट्रिय सभाको निर्वाचन नहुन्जेल संघीय संसदले पूर्णता नपाउने अडान राख्दै आएको थियो । राष्ट्रिय सभाको निर्वाचन सकिएपछि आयोगले प्रतिनिधिसभामा सिट बाँडफाँट गर्न लागेको हो ।
