काठमाडौँ, ५ असार । नियमित रुपमा लेखापरीक्षण गराएर हिसाबलाई पारदर्शी बनाउन समिति एवम् प्रतिष्ठानका प्रमुख तथा लेखाप्रमुखलाई महालेखापरीक्षक टंकमणि शर्माले निर्देशन दिएका छन् ।
महालेखा परीक्षकको कार्यालयले समिति एवम् प्रतिष्ठानका प्रमुख तथा लेखाप्रमुखसँग गरेको अन्तरक्रिया कार्यक्रममा बोल्दै प्रमुख शर्माले ऐन, कानुन र नियमावलीको अधिनमा रही प्रस्ट हिसाब राख्न निर्देशन दिएका हुन् । उनले लेखापरीक्षकसँग बसेर तीन महिनाभित्र लेखापरीक्षण सक्न निर्देशन दिएका छन् । आन्तरिक लेखापरीक्षण दिनानुदिन गर्नाले वार्षिक लेखापरीक्षण गर्न सजिलो हुने भन्दै समयमा लेखा परीक्षण नगरेका कारण अनियमितता बढेको उनले बताए । कतिपय संस्थाले वर्षौंदेखि लेखापरीक्षण नगरेको भन्दै लेखापरीक्षण नगर्नुमा लेखापरीक्षकका कार्यालयका लेखापरीक्षकको भन्दा सम्बन्धित कार्यालयकै कमजोरी रहेको बताएका थिए ।
महालेखा परीक्षकले निकालेको ५४औँ प्रतिवेदनमा २९ निकाय अन्तर्गत रहेका एक हजार १९५ इकाईको लेखापरीक्षण गर्नुपर्नेमा आधा इकाईको पनि हुन नसकेको महालेखापरीक्षकको कार्यालयले जनाएको छ । समिति तथा प्रतिष्ठानमध्ये नगर विकास कोष, व्यापार तथा निकासी प्रवद्र्धन केन्द्र, गरिबी निवारण कोष, प्रेस काउन्सिल लगायत कार्यालयले नियमित लेखापरीक्षण गराएको र बेरुजु नरहेको बताइएको छ । यस्तै, त्रिभुवन विश्वविद्यालय, नेपाल प्रज्ञा प्रतिष्ठान, वैकल्पिक उर्जा प्रवद्र्धन केन्द्र लगायतका कार्यालयको धेरै बेरुजु रहेको लेखा परिक्षण कार्यलयले जनाएको छ ।
