काठमाडौँ, जेठ ८ । जनताको नयाँ इतिहासको जन्म दिन भएकाले गणतन्त्र दिवसको महत्वलाई उजागर गर्ने ढंगबाट प्रचार प्रसारको व्यवस्था मिलाउन सञ्चार तथा सूचना प्रविधि राज्यमन्त्री गोकुलप्रसाद बाँस्कोटाले निर्देशन दिएका छन् ।
गणतन्त्र दिवस मनाउन गठित प्रचारप्रसार उपसमितिका संयोजक राज्यमन्त्री बाँस्कोटाको अध्यक्षतामा मंगलबार मन्त्रालयमा बसेको बैठकमा जनतासम्म गणतन्त्रको महत्वको सकारात्मक सन्देश प्रवाह गर्ने ढंगले प्रचारप्रसारको तयारीको व्यवस्थापन मिलाउन मातहतका निकायलाई उनले सुझाव दिएका छन् ।
वि.सं २०६५ जेठ १५ गते संसद्बाट नेपाललाई संघीय गणतन्त्र मुलुक घोषणा गरिएको थियो । गणतन्त्र जनताको व्यवस्था हो, सरकारको होइन, परम्पराभन्दा अलि बेग्लै ढंगको र सिर्जनशील ढंगले गणतन्त्र सम्बन्धी विषयवस्तु प्रस्तुत होस् उनले भने ।
गणतन्त्रपछि समाजले गरेको उपलब्धि, आर्थिक विकास, लगानी प्रवद्र्धन, वैदेशिक सम्बन्धजस्ता विषयलाई ऊजागर गर्न सुझाव दिँदै उनले गणतन्त्रलाई संस्थागत गर्न युवा पुस्तालाई गणतन्त्र ल्याउन भएको आन्दोलन र योगदानको जानकारी गराउन आवश्यक औंल्याए ।
मुलुकमा राजनीतिक परिवर्तनका आन्दोलनमा सक्रिय सहभागी रहेका नागरिकको उत्साह, आजको मूल्यांकन र उनीहरुले चाहेको आगामी बाटो समेटिएको जीवन्त कथा जस्ता घटनालाई प्राथमिकताका साथ प्रचारप्रसार गर्न सुझाव दिँदै उनले गणतन्त्रलाई कमजोर तुल्याउने खालका एउटै पात्र र उही गन्थनलाई दोहोर्याउन आवश्यक नरहेको सल्लाह दिए ।
मन्त्रालयका सचिव महेन्द्रमान गुरुङले आगामी गणतन्त्र दिसवलाई भव्य रुपमा मनाउन मातहतका निकायका प्रमुखलाई आवश्यक कार्यक्रम बनाएर प्रचारप्रसारमा जुट्न अनुरोध गरेका छन् । उक्त अवसरमा यही जेठ १४, १५ र १६ गते तीन दिनसम्म गणतन्त्र दिवस भव्यसँग मनाउन आ–आफना संस्थाले तयार गरेको कार्यक्रमका बारेमा मातहतका संस्थाको तर्फबाट जानकारी गराइएको छ ।
जेठ १५ गते हुने मूलसमारोह बाहेकका दिनमा पनि गणतन्त्रको महत्वबारे रेडियो नेपालले परिसंवाद तथा नेपाल टेलिभिजनबाट गणतन्त्र ल्याउन भएका आन्दोलन सम्बन्धी वित्तचित्र र योगदानबारे प्रचार प्रसारका कार्यक्रम चलाउने बताइएको छ ।
बैठकमा रेडियो नेपालका कार्यकारी निर्देशक सुरेश कार्की, नेपाल टेलिभिजनका महाप्रबन्धक गोविन्द रोक्का, गोरखापत्र संस्थानका अध्यक्ष गोविन्द पोखरेल, महाप्रबन्धक वसन्त उपाध्यायलगायत मन्त्रालय मातहतका निकायका प्रमुखको सहभागिता थियो ।
गणतन्त्रलाई भव्य रुपमा मनाउने सन्दर्भमा सरकारी तथा निजी सञ्चार माध्यमलाई जिम्मेवार बनाएर काम गर्न गराउन आवश्यक रहेको सुझाव दिइएको छ ।
