सहमहामन्त्रीमा रामहरि खतिवडाको दाबी
काठमाडौँ — नेपाली कांग्रेसका नेता रामहरि खतिवडाले पार्टीको १५औँ महाधिवेशनमा सहमहामन्त्री पदमा उम्मेदवारी दिने घोषणा गर्नुभएको छ।
महामन्त्री पदका लागि आकांक्षा राख्दै आउनुभएका खतिवडाले पछिल्लो राजनीतिक परिस्थिति र पार्टीभित्रको छलफलपछि सहमहामन्त्रीमा आफ्नो दाबी प्रस्तुत गर्नुभएको हो। उहाँले साथीहरूबाट सहमहामन्त्रीमा उम्मेदवारी दिन सुझाव आएको र सोहीअनुसार निर्णयमा पुगेको बताउनुभएको छ।
ओखलढुङ्गाबाट खुलातर्फ महाधिवेशन प्रतिनिधिमा निर्वाचित खतिवडाले पार्टीको संगठनलाई थप गतिशील बनाउने र कांग्रेसलाई बदलिँदो राजनीतिक परिस्थितिअनुसार अघि बढाउने विषयलाई आफ्नो राजनीतिक प्राथमिकताका रूपमा प्रस्तुत गर्दै आउनुभएको छ। उहाँ यसअघि कांग्रेसको केन्द्रीय सदस्यसमेत रहिसक्नुभएको छ।
कांग्रेसको १५औँ महाधिवेशनमा विभिन्न पदाधिकारीका लागि उम्मेदवारी घोषणा गर्ने क्रम तीव्र भइरहेका बेला खतिवडाले पनि सहमहामन्त्री पदमा आफ्नो उम्मेदवारी सार्वजनिक गर्नुभएको हो। महाधिवेशनबाट विभिन्न समावेशी समूहबाट आठ जना सहमहामन्त्री निर्वाचित हुने व्यवस्था छ।
खतिवडाको उम्मेदवारीसँगै कांग्रेसको नयाँ नेतृत्व चयनमा सहमहामन्त्री पदको प्रतिस्पर्धा पनि थप रोचक बनेको छ।
